ബെംഗളൂരു : സംസ്ഥാന ദുരന്ത നിവാരണ സേനയിലെ (എസ്.ഡി.ആർ.എഫ്) സർക്കിൾ ഇൻസ്പെക്ടർ (സി.പി.ഐ) ശ്രീശൈല ചൗഗലയെ (37) വീടിനുള്ളിൽ തൂങ്ങിമരിച്ച നിലയിൽ കണ്ടെത്തി. വ്യാഴാഴ്ച ബെൽഗാമിലെ ചന്നമ്മ നഗറിലുള്ള അദ്ദേഹത്തിന്റെ വസതിയിലായിരുന്നു സംഭവം.
ചൗഗല മുറിക്കുള്ളിൽ കയറി കതകടച്ചതിൽ സംശയം തോന്നിയ ഭാര്യ ഉടൻ തന്നെ എസ്.ഡി.ആർ.എഫിലെ മറ്റ് ഉദ്യോഗസ്ഥരെ വിവരമറിയിക്കുകയായിരുന്നു. തുടർന്ന് സ്ഥലത്തെത്തിയ ഉദ്യോഗസ്ഥരും സഹപ്രവർത്തകരും ചേർന്ന് മുറിയുടെ വാതിൽ തകർത്ത് അദ്ദേഹത്തെ പുറത്തെടുത്ത് ഉടൻ തന്നെ ആശുപത്രിയിൽ എത്തിച്ചെങ്കിലും അതിനോടകം തന്നെ മരണം സംഭവിച്ചിരുന്നതായി ഡോക്ടർമാർ സ്ഥിരീകരിച്ചു.
മാനസിക വിഷമങ്ങളെത്തുടർന്നുള്ള ആത്മഹത്യയെന്നാണ് പ്രാഥമിക നിഗമനമെങ്കിലും, ജീവനൊടുക്കാനുണ്ടായ കൃത്യമായ കാരണം എന്താണെന്ന് ഇതുവരെ വ്യക്തമായിട്ടില്ല. മൃതദേഹം ഇപ്പോൾ പോസ്റ്റ്മോർട്ടം നടപടികൾക്കായി ബി.ഐ.എം.എസ് ആശുപത്രി മോർച്ചറിയിലേക്ക് മാറ്റിയിരിക്കുകയാണ്.
സംഭവവുമായി ബന്ധപ്പെട്ട് ഉദ്യോഗ്ബാഗ് പോലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ട്. ഉന്നത ഉദ്യോഗസ്ഥന്റെ അപ്രതീക്ഷിത വിയോഗത്തിന്റെ പശ്ചാത്തലത്തിൽ പോലീസ് അന്വേഷണം ഊർജ്ജിതമാക്കിയിരിക്കുകയാണ്. വിശദമായ അന്വേഷണത്തിലൂടെ മാത്രമേ മരണത്തിലേക്ക് നയിച്ച യഥാർത്ഥ കാരണം വ്യക്തമാകൂ എന്ന് പോലീസ് അറിയിച്ചു. പരേതനായ ചൗഗുലയുടെ സംസ്കാര ചടങ്ങുകൾ വെള്ളിയാഴ്ച രാവിലെ 9.30 ന് നടക്കും.
